今日一個人食lunch，諗住快快食完行商場惡補一下今期春裝潮流趨勢，否則點同公司班90後妹妹仔有話題。打工仔食晏搭枱好平常，大家辛苦搵來志到食，我一向唔抗拒搭人枱或被搭枱，大家俾條生路行下！我自己一個人食飯時仲有鋪癮，就係專揀同幾個OL一齊坐，佢真人talk show，有時好聽過收音機凈係顧住笑節目。遇到OL墟，我會一邊食一邊聳起耳仔聽聽時下職場百態。
今日話題：
OL甲：「今年公司搞唔搞旅行？」
OL乙：「做到數咪有得去囉！」
OL丙：「唔好喇！我唔想去，舊年我俾阿頭捽得好緊要，要交數，幾個月做得好辛苦，我寧願唔去。」
OL甲：「我都係咁話！舊年去台灣，老公留港湊住對仔女，我好唔放心，搞到我精神緊張，整死我好多細胞，衰過返工！」
OL丙：「點解唔近近去澳門？迪迪尼或者海洋公園我都殺，唔使去到咁遠！」
OL乙：「你可以揀唔去！」
OL甲：「但數要照交囉！咁叫有得揀咩！？」
OL乙問：「如果去日本、韓國，你去唔去？」
OL甲、丙：「去去去！辛苦幾個月，乜都抵番！」
聽到呢度，我終於明白。公司搞旅行，重點不在於係咪要交數、地點遠定近，而係目的地有幾吸引。人就係咁，無得俾時你就怨無，俾你就呻唔夠好。我公司搞幾年旅行，目的地年年唔同，朋友聽到我公司有得去旅行，不知幾羨慕。身在福中要知福，幸福並不是必然！
撰文：KJer
天性愛自己做自己事，落在夾心管理階層，偏偏要管人管事，兼上顧下，難為中間人。
>> 以上內容由Recruit提供